Денешната прва од вкупно трите вечери на Макфест ќе биде посветена на млади пејачи за да им се даде шанса музички да се дефинираат, рекоа од уметничкиот одбор на фестивалот, кој почнува вечерва (23 октомври) во Домот на културата „Ацо Шопов“ во Штип.
Макфест традиционално започна со фестивалското знаме кое го кренаа пејачите Лара Иванова, Валдера и Зоран Илиев (фото). На прес-конференцијата, градоначалникот на Штип, Иван Јорданов, рече дека Макфест не е само штипски фестивал, туку е голем македонски бренд, кој ја негува македонската музика и е сцена за развој на младите музички таленти.
Првата фестивалска вечер ќе настапат 13 пејачи: Валдера (Влатко Иљачев), Анастасија Никова, Дорис Димовска (Дорис Ди), Бобан Вељановски, Марија Наумоска, Катерина Јовановиќ, Бони и Тони, хрватскиот пејач Дино Петриќ, Санела Шукриновска, Стефан Ефремов, Агни Авшар и Елена Наумова.
„Ова се млади музички таленти, од кои некои и досега имале забележителни јавни настапи, но за сите нив важи правилото дека токму Макфест е можноста како понатаму ќе градат музичка кариера“, вели уметничкиот директор на Макфест, Роберт Саздов.
Утревечер ќе настапат искусни пејачи, а на 25 октомври е прославата на 40 години Макфест. Ова ќе биде вечер на најголемите хитови, што ќе ги пеат Тања Кочовска, „Силви бенд“, Питер Џон Босе, Владо Јаневски, Сашо Гигов-Гиш, Ристо Самарџиев, Мики Јовановски-Џафер, Ламбе Алабаковски, Пајак и Лара и други.
Од сите три вечери МРТ ќе врши директен пренос од 20 часот, а водители ќе бидат Марјана Станојковска и Димитар Атанасовски.
Т. ЈОВАНОВСКИ
