Млади пејачи и музичари настапија вчера (25 јануари) во спомен-куќата „Тодор Проески“ во Крушево на одбележувањето на денот кога Тоше Проески ќе наполнеше 45 години. Песни од Тоше пееја Ребека и Леона Јанкоски, Кирана Ивановска, Дорис Димовска, Марија Аличанец и Јана Мрческа.
Покрај музичкиот дел, беше промовирана и книгата „Душа остана“ од младиот автор Бојан Тодоровски од Битола. Книгата е насловена по една од песните на Тоше.
„И по толку години, пораката ‘Ве сакам сите’ сѐ уште силно одекнува во нашите срца. Младите музички таленти со своите гласови уште еднаш нѐ потсетија на големината на Тоше“, велат од Спомен-куќата.
Денот на раѓањето на Тоше се одбележа и во Скопје. Учениците од ДМБУЦ „Илија Николовски-Луј“ одржаа концерт со негови песни во концертната сала на училиштето, која беше полна.
На 24 јануари се обедини бендот на Тоше Проески, кој го следеше на сите концерти и турнеи и одржа концерт со негови песни во еден скопски клуб.
На 23 јануари, во ОУ „Лазо Ангеловски“ во скопската Општина Аеродром се одржа културно-уметничкиот настан „Тоше те сакаме“. На настанот се пееја песни од Тоше, а се одржа и изложба во негова чест. Настапија поп-пејачите Огнен Здравковски, Марија Спасовска, Тамара Волческа, Владимир Поповски, Мартинијан Кириловски, Наде Талеска, Лили Акустик и Васил Ангелов.
„Влезот за настанот беше бесплатен, а сите учесници настапија без финансиски надомест, со што целиот настан беше реализиран без финансиски трошоци, воден исклучиво од желбата за заедништво, култура и почит“, велат организаторите.
М. ЏАРОВСКА
