„Игра на тронови“ е најдобра драма, а „Прекрасната госпоѓица Мејзл“ е најдобра комедија на 70. доделување на телевизиските награди Еми, што се одржа во Лос Анџелес.
Овие две серии се и најголемите победници на вечерта, откако првата освои вкупно девет, а втората осум статуетки. „Игра на тронови“, која лани не беше во конкуренција, сега има колекција од 46 награди Еми, а допрва треба да се емитува последната сезона.
Во категоријата минисерија славеше „Убиството на Џани Версаче: американска крими приказна“.
Пред да ѝ ја предаде улогата на Елизабета Втора на Оливија Колман, Клер Фој беше прогласена за најдобра драмска актерка за „Круна“, а во машка конкуренција, наградата му припадна на Метју Рајс за „Американци“.
„Ми дадоа улога за која мислев дека никогаш нема да ја играм. И серијата продолжува, што ме прави многу среќна. Затоа ја посветувам оваа награда на следната екипа“, изјави Фој.
Најдобри актери во комедија се Бил Хејдер („Бери“) и Рејчел Броснахан („Прекрасната госпоѓица Мејзл“), додека Хенри Винклер („Бери“) освои Еми за најдобар спореден актер во комедија 42 години откако првпат беше номиниран.
Награди за споредна улога освоија и Алекс Борстин („Прекрасната госпоѓица Мејзл“/комедија), Питер Динклиџ („Игра на тронови“/драма) и Тенди Њутн („Западен свет“/драма).
