Петтата и последна сезона на една од најпопуларните серии на „Нетфликс“, „Чудни нешта“ (Stranger Things) ќе се прикаже во три дела, конечно објави стриминг-гигантот.
„Нетфликс“ објави тизер во кој се соопштува дека првиот дел ќе се прикаже на 26 ноември, вториот на 25 декември, и третиот на 31 декември 2025.
Четвртата сезона на „Чудни нешта“ премиерно се прикажа во летото 2022 во два дела, а беа објавени одделно во мај и јули. Сите епизоди траеја повеќе од 60 минути, а последната епизода од вториот дел траеше повеќе од два часа.
Снимањето на петтата сезона почна во јануари 2024, откако беше одложено поради штрајкот на холивудските сценаристи и актери во 2023.
„Чудни нешта“ дебитираше на „Нетфликс“ во 2016 и стана неговата најгледана серија на англиски јазик. „Нетфликс“ претходно најави дека работи и на спиноф серија „Чудни нешта“.
(Фото: Нетфликс)
