Сара Мишел Гелар (фото) треба да се врати во насловната улога во новата верзија на серијата „Бафи убиец на вампири“, која е во подготовка. Пилот-епизодата ќе ја режира оскаровката Клое Жао, која важи за голема обожавателка на серијата.
Сајтот „Дедлајн“ објави дека пилот-епизодата е нарачана од стриминг платформата „Хулу“, а извршна продуцентка ќе биде легендарната пејачка Доли Партон, чија продукциска компанија „Сандолар“ ја создаде оригиналната серија.
Засега не е потврдено дали би се вратил уште некој актер од оригиналната серија, чиј креатор Џос Ведон не е вклучен во новиот проект откако пред три години беше обвинет за серија случаи на недолично однесување на филмски сетови.
„Бафи убиец на вампири“ се емитуваше од 1997 до 2003, а потоа излегоа и пет сезони на спиноф серијата „Ангел“.
