Музејот на Град Скопје сношти (4 април) беше претсен за сите гости на отворањето на изложбата „Странски сликари во Македонија во периодот 1850-1950“. Меѓу бројните посетители беа и амбасадорите на Германија и Австрија во Македонија, како и претставници од други амбасади и институции од Македонија.
На изложбата беа претставени над 130 оригинални ликовни дела од странски сликари кои во наведениот период престојувале во Македонија и при тоа изработиле: масла на платно, акварели, графики, цртежи, инспирирани од Македонија, луѓето кои тука живееле и работеле, од архитектурата, од природните убавини на Македонија. Сите овие ликовни дела се дел од приватната колекцијата на Влатко Милошевски која тој ја собирал 20 години.
Милошевски по струка е електроинженер и со семејството живее и работи во Холандија. Оваа негова колекција е плод на упорна работа, голем ентузијазам и речиси секојдневно истражување по светските аукциски куќи во потрага по ликовни дела кои се сврзани со Македонија. Го избрал овој период 1850-1950 година, бидејќи како што вели тоа е најзначајниот период за човештвото, но и за историјата на Македонија.
„Периодот 1850-19580 година, на кој се однесува и мојата збирка слики, не е случајно одбран, бидејќи е многу интересен за човештвото. Сè што е измислено денес и што уживаме во благодатите на технологијата е измислено во тој период: телевизија, радио, автомобил, авион, телекомуникациите, фотоапаратот, микрочиповите… сè е од овој период. Но, и од гледна точка на уметноста, речиси сите значајни ликовни правци настанале во овој период: ориентализам, импресионизам, експресионизам, кубизам, модернизам. Овде, на оваа изложба има 132 уметнички дела, во Холандија имам уште околу 40 слики и се надевам дека еден ден, целата оваа моја колекција ќе се врати дома, во Македонија, бидејќи таа заслужува да има една ваква поставка“, рече Милошевски на отворањето.
Изложбата ќе биде отворена до 23 април.
З. АНДОНОВ
