Фестивалот „Таксират“ ја збогати концертната програма што ќе ја следи ПИН музичката конференција со четири нови имиња, кои се најавени како претставници на новата музичка сцена од регионот и Европа. Тие ќе настапат во МКЦ на 1 декември.
„Баба зула“ е турски психоделичен бенд, кој го опишува својот стил како ориентален рокенрол, комбинирајќи традиционални инструменти со електронски и модерни звуци.
„Итс евриван елс“ е словенечко дуо, кое ги проширува границите на електронската музика, внесувајќи примеси на ноиз, хардкор, индастријал и поп.
Српската рок група „Визељ“ доаѓа во Скопје во рамките на промоцијата на нејзиниот прв албум „Најдобри“, додека „Ексесив висаж“ е авангарден рок бенд од Берлин, предводен од пејачката Лариса Блау.
ПИН музичката конференција ќе се одржи од 30 ноември до 2 декември и ќе биде вовед во неколкудневната програма на 19. издание на „Таксират“, кој претходно ги потврди настапите на австралиско-американскиот бенд „Лајрс“ (30.11.) и на босанскиот виртуоз на хармоника Марио Батковиќ (2.12.).
