Октетот „Игњац Фукс“ од Хрватска вечерва во 21 часот ќе одржи концерт во „Св. Софија“ на Охридско лето. Ќе настапат Костадин Богданоски-прва виолина, Фросина Богданоска-втора виолина, Хивоте Тадезе-виола, Никола Јовановиќ-виолончело, Александар Тасиќ-кларинет, Виктор Кирченко-хорна, Жарко Перишиќ-фагот и Илин – Диме Димовски на контрабас.
Мешовитиот камерен ансамбл „Игњац Фукс” е формиран во јуни, 2016 по иницијатива на македонско-хрватскиот контрабасист Димовски и на српскиот кларинетист Тасиќ, за формирање на флексибилен ансамбл во кој членуваат најистакнатите класични музичари од бившите југословенски простори, како што е и случајот со ансамблот на „Но бордерс“ каде што Тасиќ и Димовски се запознале.
Името на ансамблот е всушност првото име на познатиот хрватски композитор Ватрослав Лисински кое е воедно и името на концертната сала во која секојдневно работат некои од членовите на ансамблот во Загреб.
Костадин Богданоски е прва виолина и работи како концерт мајстор во Операта „Лисеу“ во Барселона. Фросина Богданоска е член на филхармонијата во Клагенфурт, Австрија и водач на вторите виолини во „Но Бордерс“ оркестарот.
