Еколошката организација на Леонардо ДиКаприо донираше пет милиони долари за обнова на амазонските дождовни шуми по последните пожари, кои оваа година избувнаа во рекорден број. „Earth Alliance“ ќе ги даде парите на локални групи и домородни заедници кои работат на заштитата на Амазонија.
Бразилската вселенска агенција објави дека оваа година имало над 75.000 пожари низ Бразил, во споредба со 40.000 лани.
„Со уништувањето на амазонските дождовни шуми се уништува и екосистем кој апсорбира милиони тони јаглероден диоксид секоја година и е еден од нашите најдобри одбрани против климатската криза“, се вели во соопштението на организацијата.
„Earth Alliance“ беше основана во јули од ДиКаприо и од двајца други филантропи, со цел заштита на дивиот свет, климата и на правата на домородните луѓе.
„Длабоко сум загрижен за кризата во Амазонија, која ги загрозува климатската рамнотежа и тамошните биодиверзитет и домородни луѓе“, напиша ДиКаприо на Инстаграм.
