Без големи прослави и церемонии поради пандемијата на коронавирусот, македонското знаме денеска во 15 часот беше кренато пред седиштето на НАТО во Брисел, каде што отсега ќе се виори покрај 29-те на останатите земји членки.
На скромниот свечен чин, на кој беа интонирани химните на Македонија и на Алијансата, присуствуваа единствено генералниот секретар на НАТО Јенс Столтенберг и шефот на македонската мисија во НАТО, Зоран Тодоров.
„Денеска го прославуваме најголемиот успех на Македонија од нејзиното осамостојување“, рече техничкиот премиер Оливер Спасовски.
По речиси три децении стремежи и повеќе од една година откако амбасадорите на земјите членки го потпишаа Пристапниот протокол, тој пред две недели беше ратификуван и од шпанскиот парламент, со што Македонија и официјално стана 30. членка на НАТО.
