Една од најпознатите улици на светот конечно доби освежување, и тоа благодарение на карантинот во Велика Британија прогласен поради коронавирусот.
Лондонската улица Еби роуд, чиј пешачки премин е магнет за туристи благодарение на истоимениот албум на „Битлс“ и култната фотографија од 1969, сега е празна бидејќи луѓето седат дома, согласно мерките за превенција од КОВИД-19. Се проценува дека повеќе од 300.000 туристи годишно го посетуваат местото.
Тоа им даде шанса на комуналните служби да го бојадисаат и освежат пешачкиот премин во улицата во северозападниот дел на Лондон.
Местото во 2010 беше прогласено за заштитено подрачје од национално значење и со тоа стана прва улица која добила таков статус, па секој зафат мора да биде одобрен од локалната самоуправа.
