Дејвид Атенборо се враќа во програмата на Би-Би-Си на 97 години како наратор на третото издание на природонаучната серија „Планетата Земја“. Тој првпат го позајми гласот за оваа серија во 2006, а истото го направи и за втората сезона во 2016.
Би-Би-Си сега потврди дека смирувачкиот глас на Атенборо ќе ги води гледачите и низ третата сезона на „Планетата Земја“, која ќе има премиера подоцна оваа година.
„‘Планетата Земја‘ не би била тоа што е без Дејвид и пресреќен сум што тој ќе ја презентира и третата сезона“, изјави извршниот продуцент Мајк Гантон.
Третата сезона беше одобрена уште во 2019, но продукцијата беше одложена поради ковид пандемијата.
Атенборо го посвети својот живот на конзерваторството и во ТВ-кариерата долга речиси седум децении беше водител на стотици серии и емисии за природата.
(Фото: ПА)
