Додека дел од нејзините врсници имаат можност амбасадите да ги видат само во медиумите, таа имаше шанса да биде амбасадорка на Шведска на еден ден. Ивана Новачевска е втора година во Гимназијата „Јосип Броз Тито“ во Битола и беше избрана на конкурс за кратката, но за нејзина возраст многу значајна дипломатска функција.
„Се пријавив со мотивационо писмо во кое ги кажав сите проекти во кои што сум учествувала досега. На конкурсот бараа девојче на возраст од над 15 години кое е подготвено да зборува за сериозни теми, како насилството врз жени и девојчиња. Изборот го направи самата амбасадорка. Немам живеено во Шведска, но ја имам посетено двапати и имав можност да прошетам низ Малме, Лунд, Еслов и Хелсингборг“, вели Новачевска.
Шеснаесетгодишната битолчанка имаше сериозна агенда за еден ден: дури четири средби со шведската амбасадорка Ами Ларсон Јаин, а се сретна и со делегати од Европската Унија, меѓу кои и со заменик-амбасадорот Бен Нупнау, претставници на Европска куќа во Скопје и со организациите Хелсиншки комитет за човекови права, Фондација „Квинна тилл Квина“, која во Шведска ја водат Македонци и Македонско здружение на млади правници.
„Морам да признам дека работата како амбасадор е доста тешка, но мислам дека гостопримливоста и професионалноста на сите во амбасадата ми направи да се чувствувам добредојдена и почестена. Сѐ ми беше интересно и едукативно, а токму тоа сакав да го извлечам од оваа прилика“, вели Новачевска.
„Во амбасадата прв официјален јазик е шведскиот и цел персонал го зборува. Истовремено, сите се повеќејазични, бидејќи без исклучок зборуваат англиски, а дел од нив и македонски и албански. Со мене зборуваа на англиски и по нешто на македонски. Голем впечаток ми остави амбасадорката Ами Ларсон Јаин, која го изучува македонскиот јазик“, додава таа.
На состанок во резиденцијата, со амбасадорката разговарале за врсничкото насилство, но и за теми како етничка и родова еднаквост.
„Пораката на проектот гласеше ‘Жените и девојчињата можат и умеат’ и мислам дека сосема го докажавме тоа“, кажа Новачевска.
Неа ја привлекуваат изучувањето јазици, комуникациски вештини, право и социолошки аспекти, како и пишаниот збор, сцената и музиката. Смета дека е сѐ уште рано да каже дали во животот би работела дипломатска работа.
Ж. ЗДРАВКОВСКА
Фото: Шведска амбасада
