Кинотеката ја најави неделата на шпански филм, што ќе трае од 18 до 23 ноември и ќе опфати разни епохи од оваа кинематографија, и класични и современи наслови.
Првата проекција е на 18 ноември, кога ќе може да се гледа „Змија в пазуви“ на Карлос Саура, снимен во 1976 година. Следниот ден ќе се прикаже уште еден филм на овој режисер, „Лиза, љубов моја“ од 1977.
Следуваат „Внатрешното море“ (фото) на Алехандро Аменабар од 2004 (20 ноември) и „Смртта на велосипедистот“ на Хуан Антонио Бардем од 1955 (21 ноември), а ревијата ќе се заокружи на 23 ноември со „Перфектно злосторство“ на Алекс де ла Иглесија од 2004 година.
Неделата на шпански филм е во организација на Амбасадата на Кралството Шпанија и Кинотеката на Македонија.
