Американскиот пејач Џастин Тимберлејк објави дека му е дијагностицирана лајмска болест. Тој рече дека бил шокиран кога ја добил дијагнозата, но дека конечно добил објаснување зошто „додека бил на сцената имал огромни болки во зглобовите и чувствувал замор или мачнина“.
Пејачот и актер ја објави веста на Инстаграм по завршувањето на неговата светска турнеја „Forget Tomorrow“.
Лајмска болест е бактериска инфекција која може да се пренесе на луѓето преку заразени крлежи. Лица кои се лекувале од оваа болест можат со години да имаат симптоми, како замор, болки и губење на енергија.
Tмберлејк рече дека размислувал да ја прекине турнејата, но на крајот решил да продолжи.
„Ми беше дијагностицирана лајмска болест, ова не го кажувам за да ви биде жал за мене, туку за да појаснам со што се соочував зад сцената. Ако сте ја имале оваа болест или познавате некого кој ја има, тогаш знаете дека живеењето со ова може да биде немилосрдно исцрпувачки, и ментално и физички“, напиша пејачот.
(Фото: Гети)
