Австриските власти изјавија дека земјата ќе одбие да биде домаќин на Евровизија во 2026 доколку Израел биде бојкотиран. Ова го најавија канцеларот Кристијан Штокер и генералниот секретар на владејачката Австриска народна партија, Александер Прол.
Европската радиодифузна унија (ЕБУ), која го организира годишното музичко натпреварување, соопшти дека нејзините членки ќе гласаат во ноември дали да се исфрли Израел. Неколку земји, како Шпанија, Холандија, Ирска и Словенија, најавија дека нема да настапат следната година ако му се дозволи на Израел да учествува.
Наспроти ова, германскиот канцелар Фридрих Мерц изјави дека Германија ќе се повлече од Евровизија ако Израел биде исфрлен, велејќи дека тој припаѓа таму.
Ако Австрија се откаже од организацијата, националната телевизија ОРФ ќе биде казнета со 40 милиони евра.
