„Парамаунт“ објави дека ќе се снима четвртиот дел на акционата комедија „Гас до крај“ (Rush Hour) набргу откако се појавија извештаи дека Доналд Трамп лично се залагал за обновување на франшизата.
Брет Ратнер, кој ги режираше првите три филма пред да падне во немилост на Холивуд поради обвинувања за сексуално вознемирување, ќе биде режисер и на новиот филм. Тој се зближи со претседателското семејство откако го режираше документарецот „Меланија“, за чие објавување „Амазон“ платил 40 милиони долари.
Во „Гас до крај 4“ се враќаат и ѕвездите на франшизата Џеки Чен и Крис Такер, кој немаше главна улога во последните 15-ина години.
Оригиналниот „Гас до крај“ од 1998, кој следи двајца полицајци кои се принудени да работат заедно за да ја спасат киднапираната ќерка на кинески дипломат, беше огромен хит во кината, заработувајќи 244 милиони долари ширум светот. Следните два филма беа уште поголеми комерцијални хитови, со заработка од 347 милиони и 258 милиони долари.
