Стотици милиони луѓе низ светот денеска ја пречекаа Годината на огнениот коњ, прославувајќи ја Лунарната нова година со шарени декорации, пиротехника, традиционални молитви и танцување. Ова е исклучително ретка година зашто се случува еднаш во 60 години.
Како седмо животно во кинескиот хороскоп, коњот симболизира акција, слобода, бестрашност и пробив. Затоа се предвидува 2026 да биде година исполнета со динамична енергија, силно лидерство, брзо темпо на дејствување и интензивна страст, идеална за преземање ризици, започнување нови проекти и деловни потфати, движење напред и за ослободување од ограничувањата.
„Енергијата на огнениот коњ ги засилува природните независност и немир на коњот, создавајќи моќен нагон за слобода, самоизразување и оттргнување од ограничувањата. Историски и социјално, годините на огнениот коњ честопати се совпаѓаат со превирања, културни промени и смели колективни движења, каде што луѓето се чувствуваат принудени да го оспорат авторитетот, да го редефинираат идентитетот и да се залагаат за радикални промени“, објасни Џанин Лоу, експерт за кинеска астрологија.
Случајно, Годината на огнениот коњ започнува и завршува со затемнување на Сонцето во облик на огнен прстен: над Антарктикот оваа година и над Јужна Америка и Западна Африка во 2027.
(Фото: АП)
