„Дракарис!“, му вели Денерис Таргарјен на својот змеј Дрогон, наредувајќи му да ги запали живи нејзините непријатели. Во следен момент, ликот што го игра Емилија Кларк прозборува валириски и така презема контрола врз армија од 8.000 робови.
Тоа што го кажува можеби звучи како глупост, но валирискиот дијалект, што се протега низ неколку области во „Игра на тронови“, всушност е лингвистички точен. Тој е измислен од лингвистот Дејвид Џеј Питерсон, кој има креирано повеќе од 50 фиктивни јазици, најчесто за филмови и ТВ-серии.
Питерсон го составил валирискиот јазик сосе граматиката и правилата на изговор врз основа на неколку зборови и реченици, што Џорџ Р. Р. Мартин ги вклучил во својата книга „Песна за мраз и оган“, врз која се базира мегапопуларната серија. Питерсон го создал и другиот измислен јазик што се користи во серијата, дотракиски.
„Јас аплицирав за серијата со неколкумина други многу добри креатори на јазици. Откако бев избран, работев 18 часови на ден на создавањето нови јазици. За еден месец имав 300 страници материјал, вклучувајќи граматика, преводи и фрази“, вели Питерсон.
Дотракиски јазик сега има 4.000 официјални зборови, а валириски – 2.000 и повеќе од 1,2 милиони луѓе ги учат преку онлајн курсови, најмногу во Велика Британија.
Питерсон вели дека се потребни од шест месеци до една година за да се создаде еден употреблив измислен јазик, но во нови услови добива и помалку време поради забрзаната ТВ-продукција.
За полесно учење на овие јазици, Питерсон снимил аудиоверзии за актерите и вели дека Џејкоб Андерсон (Греј Ворм) бил најдобар ученик меѓу нив.
