Гламурот по подолго време се врати на црвениот килим на денешното доделување на најпрестижните филмски награди Оскари. Златниот фустан на Кери Малиган и белиот фустан од тил на „Луј Витон“ во кој Марија Бакалова личеше на принцеза беа меѓу најзабележливте креации на првата голема модна парада за време на ковид пандемијата.
Продефилираа и доста црвени фустани, креации со тил, но и со гол стомак. Зендаја се истакна во жолт „Валентино“ фустан и „Блгари“ ѓердан со дијаманти од над 183 карати.
„Андра Деј и Зендаја ја донесоа пролетта“, вели помошник модната уредничка на „Есенс“, Ненси Хауард.
Критичарите оценуваат дека годинава се истакнале мажите од филмскиот свет, експериментирајќи со бои и материјали.
Според модната уредничка Ирина Гречко, Реџина Кинг во сината креација на „Луј Витон“ ја претстави фантазијата на црвениот килим во сезоната на награди по која копнееја гледачите.
