По речиси десет години, „Ченги“ во Сингапур го изгуби статусот на најдобар аеродром на светот. Во годишното рангирање што го прави „Скајтрекс“, на првото место се најде „Хамад“ во Доха.
Ова е признание за големите вложувања на катарската влада во националниот авиопревозник „Катар ервејс“ и во самиот аеродром, па патниците кои преседнуваат на „Хамад“ добиваат бесплатно разгледување на градот, сместување и храна.
„Во услови кога патничките центри во светот беа погодени од пандемијата, ‘Хамад‘ остана недопрен од ограничувањата во патувањето и продолжи со своите планови за проширување и подобрување на стандардите“, соопшти „Скајтрекс“.
Второто место му припадна на „Ханеда“ во Токио, а „Ченги“, кој беше прогласуван за најдобар осум години по ред, сега е само трет. Јапонија има три аеродроми во првите десет, а најдобро рангиран европски аеродром е минхенскиот (6. место), пред Цирих и Лондон.
