Новата влада на Финска вети дека државата ќе стане јаглеродно неутрална до 2035 година, што планира да го реализира преку поголеми вложувања во инфраструктурата и во општата благосостојба.
Лидерот на Социјалдемократите Анти Рине, кој се наоѓа на чело на новата владина коалиција, во која влегоа и партиите на зелените, изјави дека е време да се инвестира во иднината по неколку години штедење.
Пека Хависто, претседателот на Зелената лига, кажа дека владината политичка програма е можеби најамбициозната на светот кога станува збор за борбата против климатски промени. Таа предвидува годишно зголемување на јавното трошење за 1,23 милијарди евра, како и еднократни инвестиции во наредните четири години во вредност од три милијарди евра, најмногу во железничката мрежа.
„Луѓето бараа побрза акција против климатски промени и ќе ја добијат. Нашата цел е да го изградиме првото одржливо општество без фосилни горива на светот. Тоа е возбудлива мисија на којашто сме подготвени“, изјави Хависто.
