Вечерва на малата сцена во Велешкиот театар „Јордан Х. К. Џинот“ премиерно ќе се изведе претставата „Свадбата“, по текстови од Алан Бол, Антон Страшимиров и Катерина Момева. Режијата е на Софија Ристевска-Петрушева, која кажа дека во претставата се раскажани три приказни и има комичен нагласок.
„На свадбата отвораме ринг, каде се борат интимните приказни на ликовите. Во вториот дел се прикажани односите помеѓу синот, снаата и свекрвата, каде на гротескен начин ги разработуваме семејните врски. Во третиот дел актерите раскажуваат лични приказни на темите свадба, брак и живот“, рече режисерката.
Ова е нејзина трета претстава во Велешкиот театар, по „Жени“ и „Старицата од Калкута“.
Во „Свадбата“ играат Јордан Витанов, Слободанка Чичевска, Весна Димитрова-Бобевски и Славица Манаскова. Преводот е на Катерина Маркоска, сценографијата на Филип Коруновски, костимите на Катерина Чукниева, кореографијата на Кире Миладиноски, а музички соработник е Сашко Костов.
Ова е втора премиера на Велешкиот театар годинава и двете се подготвени од сопствени средства.
П. ПЕЧКОВ
