Второто издание на фестивалот за литература и општа култура „Видик“ ќе се одржи од 2 до 16 април 2025, во организација на „Литература.мк“. Манифестацијата ќе има и хуманитарен карактер, па средствата од продадените билети за музичките и театарските настани ќе бидат наменети за семејствата на настраданите во пожарот во Кочани.
Во книжарницата „Литература.мк“ во трговскиот центар „Дајмонд“ во Скопје ќе се одржат 15 настани кои ги обединуваат литературата, музиката, театарот и уметноста, ќе има промоции на книги, музички настапи, театарски изведби, изложби, проекции на документарци и мултимедијални презентации.
Фестивалот ќе почне на 2 април во 19 часот со промоцијата на најновиот роман на Оливера Ќорвезироска, „Три Марии“, а следниот ден од 20 часот е театарската претстава „Лекција“ со Јовче Пандев, Калина Велковска и Маја Ѓурчевска во главните улоги. Долгоочекуваната книга посветена на Ѓорѓе Балашевиќ, „Панонскиот адмирал“ од Иван Ивачковиќ, ќе биде промовирана на 4 април.
Во музичката програма ќе настапат Дина Јашари со своето трио, „Симеон Ангеловски квартет“ и Зарина Првасевда, ќе бидат изведени театарските претстави за деца „Магичната флејта на Вулфи“ и „Себастијан и sвездите“, ќе се отвори изложбата „Соѕвездие на детските сни“ со илустрации од Ване Костуранов и ќе се промовира четвртиот роман на Моџо Килингтон, „СФ-СН“.
Второто издание на „Видик“ ќе биде затворено на 16 април со промоцијата на сонетниот венец „Часови без часовник“ од Владимир Мартиновски.
