Четвртиот концерт на Националнот џез оркестар откако свират под тоа име беше романтично потсетување на свинг музиката од 1930-тите и од 1940-тите, а се одржа сношти во Македонскиот народен театар.
На вечерта насловена „Џез лектира“, оркестарот нѐ прошета низ творештвото на биг бендот на Каунт Бејси и на соработката со современата американска џез пејачка и пијанистка Дајан Шур, добитничка на Греми награда за најдобра џез пејачка во 1986 и 1987. Нејзините песни, одлично ги испеа специјалната гостинка на концертот, Марија Димитријевиќ. Џезерите со мерак свиреа во чест на Бејси кој е првиот Афроамериканец кој освоил Греми во 1959, а го нарекувале и кралот на свингот.
Каунт Бејси е американски џез пијанист и композитор. Биг бендот го формирал во 1935 година, и го водел 50 години. За диригентот на нашиот националнен џез оркестар, Џијан Емин стана познато низ интересни анегдоти и со неговиот специфичен хумор да ги најавува песните на концертите. „Треба да останеме силни“, кажа Емин на почетокот од концертот.
За песната “Hay Burner” диригентот раскажа дека е за сите оние кои завршуваат втори во трките, исто како коњите. “Добро е да се освои и второ и трето и петто место, но најважно е да се учествува”, рече Џијан Емин.
Оркестарот отсвире и песна во чест на стотиот роденден на Воислав Бубиша Симиќ, српскиот композитор и диригент, некогашниот претседател на Здружението на композиторите и на Здружението на џез музичарите во Србија.
М. ЏАРОВСКА
