Денеска (18 ноември) во 19 часот, во Музејот на современа уметност (МСУ) во Скопје почнува 17. Биенале на млади уметници. Темата е „Утрото започна вчера“. Куратори се Нада Прља и Себастијан Чичоцки.
Биеналето денеска ќе се отвори во МСУ, а на 28 ноември во Музејот на Македонија и во основното училиште „Ј. Х. Песталоци“, развивајќи се низ четири поглавја што ги одразуваат промените на годишните времиња.
Учествуваат Џемилиана Абдулова (Скопје), Бетул Аксу (Измир/Лондон), Ренеа Беголи (Приштина), Ангела Бошевска (Битола/Скопје), Ѓорѓи Десподов (Прилеп/Хаг), Наталија Гучева (Скопје/Гент), Драгана Заревска (Кратово/Прага), Јулија Кастелучи (Белград/Милано), Сергеј Калеников (Скопје), Габриела Кичор-Бентковска (Варшава), Ана Лазаревска (Скопје), Изабела Левенска-Миљаниќ (Скопје), Милчо Манчевски и 1АМ Група од Скопје како посетување на првото БМУ од 1987 година, Јана Николоска (Скопје), Марина Саковска (Познањ), Душан Стефановски (Скопје) и Кристина Таневска (Скопје).
„Изложбата ги истражува начините и процесите преку кои емоциите и интимноста се создаваат, изразуваат и доживуваат во рамките на визуелната и социјалната естетика на современиот живот. Таа се фокусира на тоа како новите кодови од младинската култура ги обликуваат нашето поимање на поврзаноста и личното изразување денес. Преку дела кои црпат инспирација од детството или адолесценцијата уметниците го испитуваат начинот на кој современите млади генерации ги конструираат и дефинираат чувствата во секојдневието“, велат од МСУ.
(Фото: видео од Наталија Гучева „Домот е каде што е срцето“)
