Грчките власти го одбија барањето на режисерот Јоргос Лантимос да го снима својот нов филм на Акропол, најпосетуваниот локалитет во земјата. Барањето било едногласно одбиено од Централниот археолошки совет, во чија надлежност е Акропол.
Лантимос сакал да снима сцени од својот нов филм „Bugonia“ на Акропол на 10 април, што би го ограничило пристапот на јавноста до древното место на четири дена. Советот изразил загриженост поради затворањето на Акропол на толку долг период, но и поради природата на предложените сцени.
„Bugonia“ е најавен како драма за вонземјани и на Акропол требало да се снима постапокалиптична сцена. Станува збор за римејк на јужнокорејската црна комедија „Спасете ја зелената планета“ од 2003. Филмот следи двајца мажи опседнати со теории на заговор, кои киднапираат извршна директорка на голема компанија, верувајќи дека е вонземјанка која сака да ја уништи Земјата.
Во главните улоги се Ема Стоун и Џеси Племонс, а премиерата е најавена за 7 ноември.
(Фото: АП)
