Краткометражниот игран филм „Мала шега“ на режисерот Трифун Ситниковски влезе во официјалната селекција на Филмскиот фестивал во Оденсе, Данска. „Мала шега“ е во продукција на „ДНФ филмс“, копродуциран од ИРЛ од Македонија и „Изван фокуса“ од Хрватска.
Филмот раскажува приказна за тинејџерска љубов и авантура, а главните улоги ги толкуваат Јана Никодиновска и Марко Илиевски. Продуцент и монтажер е Гоце Кралевски, а копродуценти се Сашка Цветковска и Адријана Пруговечки. Кинематографер е Сергеј Сарчевски, дизајнер на продукцијата е Александра Петкова, музиката ја напиша Мартина Силјановска, а костимографијата е на Марта Дојчиновска.
Фестивалот ОФФ постои од 1975, а кратките филмови кои таму се прикажуваат се квалификуваат за Оскари и за Европски филмски награди. Оваа година ќе се одржува од 26 август до 1 септември.
