„Нетфликс“ го објави трејлерот за последниот филм на Чедвик Боузман „Ma Rainey’s Black Bottom“, за кој се вели дека би можел да му донесе и посмртна номинација за оскар. Боузман игра амбициозен трубач во филмот за легендарната американска блузерка Ма Рејни (Вајола Дејвис), која сака да се ослободи од контролата на својот бел продуцент додека го снима последниот албум во својата кариера.
„Не сакам да се натпреварувам со неговата мајка, но Чедвик беше моето бебе. Тој беше уметник и за некој толку млад, беше неверојатно да се гледа како работи“, изјави Дејвис.
Боузман почина во август на 43 години додека филмот бил во фаза на постпродукција и дури потоа се дозна дека во изминатите четири години снимал филмови во паузите меѓу многубројните операции и хемотерапии.
„Ma Rainey’s Black Bottom“ ќе се прикажува во одбрани кина во ноември, пред да биде пуштен на „Нетфликс“ во декември.
