По 18 години од песната „Итно ми требаш“, што ја испеаја со Ламбе Алабаковски, Јован Јованов и Тони Зен снимија нова песна, „Уште ми требаш“, која премиерно ќе ја испеат на Макфест на 31 октомври во Штип.
Новата песна е продолжение на онаа од 2008 година, но со нов текст, посветен на спомените што остануваат.
„Некои песни не можат да се повторат, но некои приказни заслужуваат да продолжат. ‘Итно ми требаш’ беше приказна за незаборавна ноќ. Излегуваш во клуб, некоја намерно те погледнува и ти се насмевнува и итно ти треба. ‘Уште ми требаш’ е поемотивна, се работи за спомен кој не избледел, за едно убаво сеќавање,“, вели Јованов за новата песна.
Музиката за „Уште ми требаш“ ја напиша Јован Јованов, текстот е заеднички на Јованов и Тони Зен, а продукцијата на Јован и Иван Јованов. По премиерната изведба на Макфест ќе биде промовиран и видеоспотот за песната.
