МУЗИЧКАТА ИЗДАВАЧКА КУЌА „ШАРЛА“ ОДБЕЛЕЖУВА ПЕТ ГОДИНИ ПОСТОЕЊЕ

Скопје, (СМАРТ СДК.МК)

Со промоција на три нови музички изданија, издавачката куќа „Шарла“ вечерва ќе одбележи пет години постоење. Настанот што ќе биде проследен и со изложба на дела од пет современи уметници ќе се одржи во барот „Ла Кања“ во Старата скопска чаршија, со почеток во 21 часот.

„Почнавме како аутсајдери во независното музичко издаваштво, а после пет години сме аутсајдери со повеќе од 30 официјални изданија, околу 2.000 даунлодирани и продадени албуми, 100.000 преслушувања… Наши изданија се завртеа на радија и портали од Њујорк до Хонг Конг, за нив се пишуваа осврти и рецензии во Лондон, Берлин, Прага, Љубљана, Загреб, Белград…“, се вели во најавата на настанот.

На настанот насловен „Шарла: 5 чекори поблиску“ во живо ќе настапат и два артиста од етикетата на „Шарла“, Мамот и Јашем, што е уметнички алијас на Ненад Тонкин (екс-Беј д фиш) и Димитра, која за кратко време издаде два миниалбума.