Ученици од музичките училишта од Македонија одржаа успешен концерт насловен „Младите доаѓаат“, вчера во Филхармонијата во Скопје, во придружба на оркестарот на Филхармонијата.
Младите таленти од Скопје, Битола и од Штип ја воодушевија публиката која ги врати на бис по концертот.
Настапија пијанистите Софија Михајловска и Јане Петровски од Битола, Ива Амелија Микулчиќ од Скопје и Јана Јованова од Штип, виолончелистите Ева Малиновска, Ада Богоевска и Александар Ицковски од Скопје, саксофонистите Леонид Ржаникоски од Битола и Стефан Трајановски од Скопје, контрабасистот Матеј Зимбаков од Скопје, како и соло пејачките Јована Јанкулоска и Деница Дена Симјаноска од Скопје.
Диригираше маестра Бисера Чадловска.
„Младите доаѓаат“ е традиционален концерт кој се одржува во мај или јуни, на кој им се дава шанса на младите таленти да настапат со искусните колеги од Филхармонијата. Се свиреа дела од Моцарт, Хајдн, Бернштајн, Шостакович и други композитори.
М. ЏАРОВСКА
