Драмата „Семето на светата смоква“ на иранскиот режисер Мохамед Расулоф од 27 март ќе се прикажува во скопските кина Синеплекс и Милениум, а во април и во Кинотеката и во Битола.
Филмот освои две награди на Канскиот фестивал лани и беше номиниран за Оскар за најдобар странски филм. Расулоф присуствуваше на Канскиот фестивал на голем личен ризик, откако претходно избега од Иран, каде што беше осуден на осумгодишна затворска казна.
„Прославата на унапредувањето на Иман во истражен судија се совпаѓа со масовните протести по смртта на една жена на улиците на Техеран. Демонстрациите и острата реакција на владата ја нарушуваат динамиката во неговото семејство. Додека Иман се бори со психолошкиот товар на својата работа, неговите ќерки Резван и Сана се возбудени од настаните. Кога Иман открива дека му недостасува службениот пиштол, тој станува сомничав во своето семејство и параноичен“, стои во соопштението на „МЦФ МКД филмс“.
Расулоф беше обвинет дека го снимил филмот без да добие дозвола од надлежните органи. На сите клучни учесници во филмот им е забрането да ја напуштат земјата бидејќи се под истрага на владините безбедносни сили.
(Фото: Неон)
