Поранешниот премиер Никола Груевски, осуден на две години затвор за незаконска набавка на луксузен „мерцедес“ со парите од МВР, објави на Фејсбук дека пребегнал во Унгарија и дека таму побарал политички азил. Информацијата дополнително беше потврдена од унгарското Министерство за внатрешни работи.
- Груевски е осуден на затворска казна од две години во случајот на Специјалното јавно обвинителство „Тенк“, што се однесуваше на незаконска набавка на луксузен „мерцедес“ од 600.000 евра.
- Во петокот и понеделникот, полицијата и судот не успеаја да го пронајдат Груевски на неговата домашна адреса за да му го врачат решението за издржување на казната во затворот во Шутка.
- Откако тој самиот не се пријави во затворот во предвидениот рок, Министерството за внатрешни работи распиша потерница по Груевски.
- Груевски вчера се огласи на својата Фејсбук страница, потврдувајќи дека се наоѓа во Будимпешта и дека ќе побара политички азил.
- „Во последните неколку дена примив безброј закани по мојот живот. Јас сум во Будимпешта сега и побарав политички азил од унгарските власти“, напиша тој на Фејсбук.
- Унгарија вчера попладне официјално потврди дека Груевски е во Будимпешта и дека побарал азил.
- Специјалната јавна обвинителка Катица Јанева изјави дека очекува Груевски да биде екстрадиран од Унгарија.
- Министерот за внатрешни работи Оливер Спасовски кажа дека сопругата и мајката на Груевски се во Македонија и дека ѝ дозволиле на полицијата да го побараат во нивниот дом.
- Според Спасовски, Груевски не избегал авионски, туку ја преминал границата незаконски.
