Од денеска до среда, во киното Фросина во Младински културен центар (МКЦ) по седми пат ќе се одржува Интернационалниот детски фестивал на театар на сенки „Сонот на облачето“.
Вечерва од 19:30 часот ќе се изведе претставата „Светлосни години“ на театарот „Луз микро и пунто“ од Шпанија.
Утре од 18 часот е анимираниот филм со сенки „Црна школа”, проект на младиот Фабијан Штребер од Германија, кој по проекцијата ќе одржи презентација за креативниот процес на изработка на анимацијата. Веднаш потоа, од 19:30 часот, по вторпат во Скопје гостува „Сија каса синема“ од Бразил со неговата најнова претстава „Циркус анимус“.
В среда од 19:30 часот е претставата „Алиса и чудата“, во продукција на организаторот на фестивалот, Театар „Сенки и облаци“.
Во текот на фестивалот ќе биде поставена и изложба на традиционални кинески кукли за театар на сенки, за која сценографија изработија дечињата кои ја посетија работилницата за вешто сечење хартија под водство на институтот „Конфуциј“ при УКИМ и Театар „Сенки и облаци”.
Билетите чинат по 150 денари.
