Новоизбраниот американски претседател Доналд Трамп влезе и во бизнисот на гитари. Тој на својата социјална мрежа ја најави продажбата на ограничена серија гитари наречени „45“, украсени со американско знаме и орел, како и со фразата „Да ја направиме Америка повторно голема“.
„Доаѓа наскоро! Ограничена серија на гитари ‘45‘. Направени се само по 1.300 електрични и акустични гитари. Некои се и лично потпишани“, објави Трамп на Truth Social.
Името на гитарата се однесува на неговиот статус како 45. претседател на САД.
Гитарите се продаваат по цена од 1.250 до 2.000 долари, а оние кои се потпишани од Трамп чинат 10.000 долари. Такви ќе има само 275.
Трамп има долга традиција на мешање на своите политички и бизнис интереси, па во кампањата лансираше серија брендирани производи, вклучувајќи рачни часовници од 100.000 долари и библии од 60 долари.
(Фото: Truth Social)
