Новиот моќен телескоп во Чиле ја објави својата прва снимка, покажувајќи ја својата досега невидена можност да ѕирне во мрачните длабочини на вселената. Сликата прикажува огромни шарени облаци од гас и прашина кои се вртат во регион каде што се формираат ѕвезди, 9.000 светлосни години од Земјата.
Опсерваторијата „Вера Рубин“, која е дом на најмоќната дигитална камера на светот, вети дека ќе го трансформира нашето разбирање на вселената. Ако постои деветта планета во нашиот сончев систем, телескопот ќе ја пронајде во својата прва година, велат научниците. Тој исто така треба да детектира опасни астероиди, да го мапира Млечниот Пат и да даде клучни одговори за темната материја.
Опсерваторијата објави дека телескопот за десет часа детектирал 2.104 нови астероиди и седум вселенски предмети блиску до Земјата. Се очекува „Вера Рубин“ десеткратно да го зголеми бројот на познати предмети во нашиот сончев систем.
Друг важен момент е почеток на континуирано 10-годишно снимање на јужното ноќно небо. Со својата камера од 3.200 мегапиксели, телескопот ќе прави по една фотографија на секои 40 секунди.
