Петнаесетгодишниот Андреј Ѓурчиновски освои бронзен медал во категоријата десетка на Европското првенство во билјард за играчи до 17 години, кое се одржува во Подчетртек, Словенија.
Ова е негов четврти настап на големите европски натпреварувања, а најдобриот пласман досега му беше петтото место. Младинците играат во четири дисциплини, а некои земји се натпреваруваат и во екипна конкуренција.
До својот прв медал, Ѓурчиновски стигна со пет победи во низа меѓу 77 пријавени играчи од 32 европски земји.
„Денот беше навистина долг, имав пет дуели и во нив успеав да остварам победи, па во полуфиналето почувствував замор. На патот до финалето бев сопрен од актуелниот првак Макс Бенко од Словенија. Среќен сум што ја оправдав довербата и што успеав да стигнам до медал“, кажа 15-годишниот Ѓурчиновски.
Натпреварите на Европското првенство траат до 22 јули, кога се игра последната дисциплина, популарно наречена деветка.
