Агенцијата за филм промовираше проект за доближување на домашната кинематографија до публиката под мотото „Македонски филм. На големо платно“. Проектот се реализира во соработка со Синеплекс и предвидува бесплатни проекции на македонски филмови секој понеделник од 18 часот. Влезот ќе биде бесплатен по принципот „прв дојден, прв услужен“, без претходна резервација на билети.
Програмата започнува на 6 април со „Панкот не е мртов“ во режија на Владимир Блажевски, кој одбележува 15 години од својата премиера, по што следуваат „Avec L’amour“ на Илија Цветковски (13 април), „Господ постои, името ѝ е Петрунија“ на Теона Митевска (20 април) и „Хомо“ на Игор Иванов (27 април).
Директорот на Агенцијата за филм, Сашко Мицевски, вели дека со овој проект сакаат да го доближат македонскиот филм до публиката и да му дадат поголема видливост.
„Сакаме македонскиот филм да не се гледа само на фестивали, туку да биде достапен за сите и да стане дел од секојдневието. Со оваа соработка го враќаме филмот таму каде што најмногу му прилега – на големото платно“, изјави Мицевски.
