Вечерва (23 мај) во 19:30 часот, во Домот на културата во Штип почнува 9. издание на Меѓународниот фестивал на камерни хорови Астибо фест.
„Фестивалот е проект од посебен национален интерес, па затоа е потпомогнат од државата. Како домаќини ќе се обидеме да бидат создадени сите неопходни услови за уште една музичка презентација на камерните хорови“, вели уметничката директорка на фестивалот и диригентка Ивана Ѓурѓевиќ-Јанков, која лани ја напиша книгата „Еден век хорска уметност во градот под Исарот“.
Веќе четврта година Фестивалот на камерните хорови се одржува во Домот на културата.
Претставникот нa камерниот хор „Астибо“ од Штип, Киро Митев, вели дека штипскиот Фестивал на камерни хорови е еден од трите во Македонија кои успеваат да се одржат во последно време, покрај фестивалот „Менада“ во Тетово и „Драган Шуплевски“ во Скопје.
„Покрај домаќинот, на фестивалот ќе учествуваат и камерните хорови ‘Вардар’ и ‘Кочо Рацин’ од Скопје, ‘Менада’ и мешаниот хор ‘Балтепе’ од Тетово и ‘Јагодина’ од Србија“, вели Митев.
Т. ЈОВАНОВСКИ
