Интернационалната поп вечер на 33. издание на фестивалот Охрид Фест Охридски трубадури ќе донесе современ звук, музичари од повеќе балкански земји и продукции со светски стандарди, вели музичарот, композитор и продуцент Давор Јордановски. Тој е уметнички директор на Интернационалната вечер на фестивалот која ќе се одржи на 27 август на сцената на Долни Сарај.
Според него, концептот останува насочен кон спојување на различни музички култури и современи продукциски пристапи, без фестивалот да го загуби својот препознатлив идентитет.
„Настојувавме да избереме композиции кои звучат модерно, конкурентно и радио-прифатливо, но истовремено носат свој препознатлив идентитет. Светските трендови ги следиме внимателно, но не ги копираме. Целта е тие да бидат инспирација, а не шаблон“, вели Јордановски.
Тој додава дека на Интернационалната вечер ќе настапат претставници од Македонија, Србија, Хрватска, Словенија и Босна и Херцеговина, додавајќи дека фестивалот останува важна регионална музичка платформа што ги поврзува авторите и изведувачите и отвора можности за нови соработки и промоција на македонската музика надвор од земјава.
Јордановски вели дека годинава пристигнале голем број квалитетни композиции, а особен впечаток оставил фактот што дел од авторите користеле алатки базирани на вештачка интелигенција како дел од креативниот процес.
„Верувам дека и на публиката ќе ѝ биде интересно да се обиде да препознае кои песни се создадени со поддршка на оваа технологија, иако на крајот најважни остануваат квалитетот, емоцијата и авторската креативност што ги носи секоја композиција“, вели тој.
За годинашното издание најавува и продукциски напредок, со современа сценографија, подобрен аудио-визуелен концепт, и ЛЕД екрани.
„Денес не е доволно песната само добро да звучи. Таа мора и визуелно да ја раскаже својата приказна. Верувам дека публиката ќе види модерно и атрактивно издание кое ќе покаже дека Охрид Фест’успешно ги следи современите продукциски стандарди“, додава Јордановски.
Тој очекува дел од песните да продолжат да живеат и по фестивалот и да имаат потенцијал за регионален, па и поширок меѓународен успех.
