Претставата „Четири слики на љубовта“ од швајцарскиот драмски автор Лукас Берфус, во режија на Александра Кардалевска, вечерва (30 октомври) премиерно ќе биде изведена во Центарот за култура „Антон Панов“ во Струмица. Ова е прва постановка на дело од Берфус на македонската театарска сцена.
Преку четири приказни за љубовта и неверството, претставата ги истражува сложените односи помеѓу партнерите, стравот од губење на блискоста, зависноста и потребата да се зачува врската дури и кога љубовта исчезнала.
„Она што ме привлече кај Берфус е парадоксот дека пишува за љубовта преку ликови кои, во суштина, се испразнети од љубов. Тие се обидуваат да ја зачуваат формата на односот, дури и тогаш кога неговата суштина одамна исчезнала“, вели режисерката Кардалевска.
Во претставата играат Коста Ангов, Кољо Черкезов, Оливера Арозанова-Мансбарт, Јулија Милкова и Михаил Велков.
Визуелниот концепт и сценскиот дизајн се на Онур Озџан.
