„Фолксваген“ конечно ја претстави сериската верзија на долгоочекуваното комбе „ID.Buzz“, електрична реинкарнација на култниот „микробус“, кој ќе почне да се продава во Европа во втората половина од годината, а во САД доаѓа на крајот на 2023. Од компанијата кажаа дека ова е нивниот прв прототип во изминатите десет години кој стигнал до производствената фаза. Покрај патничка, ќе има и товарна верзија на комбето.
„ID.Buzz“ доаѓа со батерија од 82 киловат-часа и може да постигне максимална брзина од 145 километри на час. Дизајнот претставува вешта комбинација на модерни линии и детали кои потсетуваат на оригиналниот „Т1 микробус“.
Засега не е потврдено колку ќе може да се помине со едно полнење на батеријата, но се очекуваат околу 400 километри.
