МОДАТА И АРХИТЕКТУРАТА ЌЕ СЕ СПОЈАТ ВО ПРВАТА „НЕДЕЛА НА ИЗЛОЗИ“ ВО СКОПЈЕ

Скопје, (СМАРТ СДК.МК)

Од утре до 17 декември, центарот на Скопје ќе наликува на модерна галерија. Станува збор за нов фестивал, насловен „Недела на излозите“, за кој основачите Кристина Глигоровска, Искра Јанковска-Михајловска и Лидија Георгиева велат дека е посветен на креативност, современост и уникатност, „доловени преку излозите кои се естетски симболи на визуелната култура на градот“.

„За првото издание на фестивалот, млади модни дизајнери и архитекти со преуредување на излозите и јавниот простор прикажани на мапата ќе го претворат центарот на Скопје во модерна галерија“, велат тие.

Фестивалот е поддржан од Амбасадата на Швајцарија.

Преуредени се излозите на книжарницата „Култура“, часовничарот „Хронометар“, Театарот за деца и младинци, книжарницата „Литература.мк“ и на продавницата за чоколадо на швајцарскиот бренд „Линт“, како и пасажот до „Литература.мк“. Зад креативниот концепт и реализацијата на секој излог стои тим составен од млади архитекти и модни дизајнери, кои на свој начин пренесуваат важни пораки до минувачите и раскажуваат различни приказни.

Мапа на уредените излози

Фестивалот почнува во 18:30 часот од првата точка на улица Македонија, кај „Линт“, па продолжува до терасата на ресторанот „Пелистер“. По официјалното отворање од амбасадорката на Швајцарија Сибил Зутер Техада и основачите на фестивалот, ќе има коктел забава со диџеј Соња Исмаил.

Партнери на првото издание на фестивалот се: Центарот за дизајн и иновации „Јавна соба“ во Скопје, Технолошко-металуршки факултет и Архитектонски факултет во Скопје и „МладиХаб“, односно Канцеларијата на претседателот Стево Пендаровски. Таа ќе биде и инфо-точка за време на фестивалот.