„ФЕРАРИ“ ЈА ПРЕТСТАВИ ПРВАТА КОЛЕКЦИЈА ОД СВОЈОТ НОВ МОДЕН БРЕНД

Маранело, (Ројтерс)

„Ферари“ ја претстави својата прва модна колекција, што претставува една од неговите најголеми инвестиции надвор од автомобилската индустрија. Креативниот директор на модниот бренд „Ферари“ е бившиот дизајнер на „Армани“, Роко Јаноне.

„Сакаме да привлечеме млади мажи и жени. Нашата целна група не се само оние кои ги купуваат колите ‘ферари‘, туку сите кои се свесни за брендот и неговите вредности“, изјави Јаноне.

Тој ја опиша колекцијата како флуидна, при што 80% од моделите се унисекс, но и луксузна, бидејќи цените се движат од 200 евра за кошула до 3.000 за капут. Понудата дополнително ќе биде проширена со модни додатоци.