Од чаши направени од винил до шапки формирани од чоколадо, модната индустрија не се одлучува секогаш за стакло и памук. Некои дизајнери претпочитаат да работат со материјал кој обично не се поврзува со модната писта.
Денес може да биде тешко да се излезе со револуционерни нови стилови. Веќе видовме практично сè. Затоа некои модни дизајнери, желни да ја покажат својата креативност, користат материјали што некои од нас би ги сметале за малку чудни.
Познат пример е облеката што американската пејачка Леди Гага ја носеше за време на Ем-Ти-Ви наградите во 2010 година, кога излезе на сцената во облека изработена од сирово говедско месо. Креацијата беше на аргентинскиот дизајнер Франк Фернандес и содржеше шапка, чевли и чанта, направени од стек.
Чоколадни фустани
Креации кои, исто така, можат да се јадат, но се далеку помалку миризливи се фустаните прикажани на Чоколадниот салон во Париз. Дел од церемонијата на отворањето на саемот за промоција на најновите трендови на чоколадо е модна ревија на којашто се претставени фустани направени од омиленото светско задоволство.
Секоја година, големи производители на чоколадо се здружуваат со познати модни дизајнери, како Исадора Деларуз и Жан Лук Деклузо, за да создадат фустани, капи, корсети, па дури и накит изработен од чоколадо.
Еден од најголемите предизвици е да ги направат издржливи, така што тие нема да се топат за време на шоуто, што е напорна работа кога температурата достигнува 30 степени Целзиусови.
Најлонски кеси со стил
Насекаде има најлонски кеси, па зошто да не се направи нешто креативно со нив? Тоа го практикува модната дизајнерка и активистка за животна средина Кател Гелебарт. Со нејзиниот бренд „Арт д’еко“, таа го трансформира пластичниот отпад во носливи палта, чанти, па дури и свечени фустани.
Очила од винил
На пазарот се продаваат и рамки за очила изработени од стари грамофонски плочи под марката „Винилајз“. Сопственикот Закари Типтон оди по продавници, бара плочи што никој не ги купува и ги користи за да направи уникатен моден додаток.
Аксесоари од стрипови
Дизајнерка од Берлин дава нов живот на стари стрипови. Софија Венинг прави футроли за телефони, паричници, табакери и рачни чанти од стари стрипови за суперхерои. Таа прво прави колаж, па ги покрива со пластика и ги шие. Муштериите кои сакаат аксесоар со одреден суперхерој можат и да си го нарачаат.
ЛЕД мода
Палтата дизајнирани од Вероника Оман од Берлин функционираат како екран, благодарение на стотици ЛЕД сијалички, кои се сошиени на платното.
Клиентот добива материјал кој може да свети во боја или интензитет според негов избор. На палтото има апликација, на која може да има и одредена слика, формирана од сијаличките. Ова сигурно е футуристички модел, со кој би можеле да се усогласат бојата на палтото и расположението.
