Пред пет века, богат германски трговец ги ставил своите куќи на располагање на сиромашнте. Населбата постои и денес, а годишниот наем е непроменет и симболичен.

Сместена во баварскиот град Аугзбург, населбата Фугерај се смета за најстариот социјален проект на светот, кој и натаму им дава покрив над глава на локалните жители кои имаат финансиски проблеми. Тие плаќаат годишна кирија од 88 центи, цена која е воведена уште во 1521 година.

Денес, 150 луѓе живеат во Фугерај, распоредени во 140 станови. Населбата добива 30-40 апликации годишно и моментално, 80 луѓе се на листата за чекање.

Условите за живот во Фугерај ги утврдил Јакоб Фугер пред точно 500 години. Во куќите биле сместувани занаетчии и физички работници кои малку заработувале, но не и питачи. Станарите морале да потекнуваат од Аугзбург и да бидат католици. За возврат, тие плаќале годишна станарина од еден рајнски гулден, што е рамно на помалку од едно евро денес и морале трипати дневно да се молат за спас на душата на Фугер.

Жителите често го опишуваат Фугерај како „село во рамките на град“ (Фото: ДПА)

Ноел Габадија (27) се доселил во Фугерај кога бил тинејџер, зашто неговата самохрана мајка не заработувала доволно.

„Ние бевме прво семејство со мигрантско потекло во населбата и бев загрижен како ќе нè прифатат, зашто тука главно живееја постари луѓе. Моите стравови беа неоправдани. Овдека сè се решава со комуникација и луѓето лесно се зближуваат“, вели Габадија.

Илона Барбер (70) живее во населбата веќе шест години, а се пријавила зашто имала премала пензија. Дели стан од 55 квадрати со две кучиња, две мачки и шест птици. Таа, меѓу другото, на туристите им наплатува влез во Фугерај, што е еден од главните извори на приходи за населбата.

Фугерај личи на затворена средновековна заедница, во која има зелени простори, мал проштад и фонтана. Жителите често го опишуваат како „село во рамките на град“.