Над 200 скејтбордери од сите континенти го претворија островот Штванице во Прага во вистински светски центар на скејтбордингот за време на 31. издание на Мистик скејт купот, еден од најстарите и најпрестижни европски скејт натпревари, кој традиционално е дел од Светскиот скејт куп.
Она што го прави овој настан посебен не се само натпреварите, туку и атмосферата. Во текот на трите дена, натпреварувањата се одвиваа без прекин, а целиот простор функционираше како мал летен фестивал покрај реката Влтава. Посетителите можеа да уживаат во бројни штандови со храна и пијалаци, релакс-зони и вечерни концерти, кои ја продолжуваа забавата по завршувањето на спортската програма.
Островот Штванице е на само неколку минути пешачење од историскиот центар на Прага и населбата Карлин, што го прави настанот лесно достапен и за туристите и за локалните жители. Веднаш до скејт паркот се наоѓа и мало крајбрежје, каде што многумина бараа разладување во водите на Влтава.
Годинава, единствен предизвик беше екстремниот топлотен бран што ја зафати Европа. Температурите достигнуваа до речиси 40 степени, но и покрај жештините, организаторите успеаја натпреварувањата да се одржат според предвидениот распоред, без одложувања.
Мистик скејт купот уште еднаш покажа дека е повеќе од спортски настан. Тоа е фестивал со опуштена, автентична скејтерска атмосфера, прилагоден за сите генерации, од семејства со деца до најверните љубители на урбаните спортови, успешно спојувајќи врвен скејтбординг, музика и летно уживање.
М. ЛАЗАРЕВСКА
