Од 26 до 28 јуни во Прага ќе се одржува Мистик скејт купот, еден од најголемите и најпрестижни скејтбординг фестивали во Европа. На 31. издание на настанот на островот Штваниче ќе се соберат над 200 врвни скејтбордери од целиот свет и има награден фонд од 30.000 американски долари.
Натпреварувачи од дваесетина земји ќе настапат во дисциплините street, vert и bowl. Натпреварите ќе вклучуваат квалификации, финалиња и специјални настапи, а настанот традиционално привлекува и голем број посетители од цела Европа. Овој тридневен фестивал е дел од Светскиот скејтбординг куп.
Мистик скејт купот се одржува од 1994 во центарот на Прага. Во неговата историја учествувале некои од најголемите имиња во спортот, како Тони Хок, Дејвид Гонзалес, Дастин Долин, Кристијан Хосои, Рони Кригер, Арто Сари, Џеф Роули, Бастиен Салабанци, Рун Глифберг, Летиција Буфони, Анџело Кaро, Адриен Булард и други.
Годинава, настанот повторно ќе го води легендарниот Дејв Данкан од Калифорнија, препознатливо лице на фестивалот уште од самите почетоци.
Освен спортскиот дел, програмата нуди богата музичка сцена со настапи на меѓународни и локални бендови и диџеи, како и зона во која водечките брендови ги претставуваат своите најнови производи. Во живо ќе настапат светски имиња како „Dilated Peoples“, „Dog Eat Dog“ и „Dune Rats“.
М. ЛАЗАРЕВСКА
(Фото: Од Мистик скејт купот во 2025)
