Голем број фустани продефилираа на саботниот избор на Мис Универзум во Њу Орлеанс, на кој победи Американката Арбони Габриел, но еден привлече посебно внимание.
Дваесет и четиригодишната Мис Тајланд, Ана Свеангам-иам, излезе на сцената во сребрен вечерен фустан, кој, иако наречен „Скриен скапоцен дијамантски фустан“, беше целосно направен од отворачи на лименки. Фустанот е дело на тајландскиот моден бренд „Манират“ и за негова изработка биле искористени стотици алуминиумски отворачи, комбинирани со кристали на „Сваровски“.
Покрај стилот на фустанот, уникатна е и приказната што стои зад него. Свеангам-иам откри дека фустанот бил инспириран од нејзиното потекло.
„Растејќи со родители кои беа собирачи на ѓубре, како дете постојано бев окружена со отпад и предмети за рециклирање. Овој уникатен фустан е наменски скроен од фрлени и рециклирани материјали. Она што обично се смета за безвредно за многумина има вредност и убавина“, напиша Свеангам-иам на Инстаграм.
(Фото: Инстаграм)
